طہارت دی حالت وچ دعا کرے، جس طراں نماز لئی وضو کیتا جاندا اے اوس طراں وضو کرے، کیونکہ ابو موسی رضی اللہ عنہ دی صحیح بخاری تے صحیح مسلم وچ حدیث اے جِہدے وچ اوہناں دا اپنے چاچے ابو عامر دے نال قصہ بیان کیتا گیا اے۔ حدیث وچ آیا اے کہ ابو عامر رضی اللہ عنہ نے ابو موسی رضی اللہ عنہ نوں آکھیا کہ اوہ نبی صلی الله علیه وسلم نوں گزارش کرن کہ آپ صلی الله علیه وسلم اوہناں واسطے دعا فرماؤن۔ ابو موسی رضی اللہ عنہ نے آپ صلی الله علیه وسلم نوں ایہدے بارے دسیا تے رسول اللہ صلی الله علیه وسلم نے پانی منگوایا، آپ صلی الله علیه وسلم نے اوہدے نال وضو کیتا ، فیر آپ صلی الله علیه وسلم نے اپنے ہتھ چکے، تے فرمایا: " یااللہ! عُبید یعنی ابو عامر دی مغفرت کر دے"۔ ابو موسی رضی اللہ عنہ کہندے نے کہ میں آپ صلی الله علیه وسلم دیاں کَچھا ں دی سفیدی وی ویکھ لئی۔ فیر آپ صلی الله علیه وسلم نے فرمایا: "اللہ! قیامت دے دن اوہناں نوں اپنی بہت ساری مخلوق توں اُتے کر دے"، یا آپ صلی الله علیه وسلم نے فرمایا کہ: " اوہناں نوں بہت سارے لوکاں دے اُتے کر دے"۔