“ខ្ញុំសូមបែរមុខរបស់ខ្ញុំតម្រង់ទៅកាន់ម្ចាស់ដែលបានបង្កើតមេឃជាច្រើនជាន់និងផែនដី ដោយកាន់តាមសាសនាដ៏ស្អាតស្អំ ហើយរូបខ្ញុំមិនមែនស្ថិតក្នុងចំណោមពួកមុស្ហរីគីនឡើយ។ ពិតប្រាកដណាស់ ការសឡាតរបស់ខ្ញុំ ការបូជាសត្វរបស់ខ្ញុំ ការរស់នៅរបស់ខ្ញុំ ហើយនិងសេចក្ដីស្លាប់របស់ខ្ញុំ គឺសម្រាប់អល់ឡោះដែលជាម្ចាស់គ្រប់គ្រងពិភពទាំងអស់។ ទ្រង់គ្មានដៃគូឡើយ។ ហើយដោយសារប្រការទាំងនោះ ខ្ញុំត្រូវបានគេ(អល់ឡោះ)ដាក់បទបញ្ជា ។ ហើយខ្ញុំគឺជាអ្នកកាន់សាសនាអ៊ីស្លាមមុនគេបង្អស់។ ឱអល់ឡោះជាម្ចាស់! ទ្រង់គឺជាអ្នកគ្រប់គ្រង។ គ្មានទេម្ចាស់ដែលត្រូវគោរពសក្ការៈដ៏ពិតប្រាកដ ក្រៅពីទ្រង់ឡើយ ឱម្ចាស់របស់ខ្ញុំ ហើយរូបខ្ញុំ គឺជាខ្ញុំបម្រើរបស់ទ្រង់។ រូបខ្ញុំបានបំពានលើខ្លួន​ឯង ហើយខ្ញុំបានទទួលស្គាលហើយនូវបាបកម្មរបស់ខ្ញុំ។ ហេតុនេះ សូមទ្រង់មេត្តាអភ័យទោសនូវបាបកម្មរបស់ខ្ញុំទាំងអស់ផងចុះ។ ពិតប្រាកដណាស់ គ្មាននរណាអាចអភ័យទោសចំពោះបាបកម្មទាំងឡាយក្រៅពីទ្រង់នោះឡើយ។ សូមទ្រង់មេត្តាចង្អុលបង្ហាញរូបខ្ញុំទៅកាន់អត្តចរិតដ៏ល្អប្រពៃផងចុះ ព្រោះគ្មាននរណាអាចចង្អុលបង្ហាញទៅកាន់អត្តចរិតដ៏ល្អប្រពៃនេះក្រៅពីទ្រង់នោះឡើយ។ ហើយសូមទ្រង់មេត្តាបង្វែរ(បញ្ចៀស)រូបខ្ញុំពីអត្តចរិតមិនល្អផងចុះ ព្រោះគ្មាននរណាដែលអាចបង្វែរ(បញ្ចៀស)រូបខ្ញុំពីអត្តចរិតដែលមិនល្អនេះ ក្រៅពីទ្រង់នោះឡើយ។ ខ្ញុំនៅទីនេះរង់ចាំទទួលអនុវត្តតាមបទបញ្ជាទាំងឡាយរបស់ទ្រង់ និងពេញចិត្តក្នុងការបម្រើទ្រង់។ សេចក្តីល្អទាំងឡាយ គឺស្ថិតក្នុងកណ្តាប់ដៃទ្រង់។ រីឯប្រការអាក្រក់វិញ ពុំមែនសម្រាប់ទ្រង់នោះឡើយ។ ជីវិតខ្ញុំ គឺអាស្រ័យលើទ្រង់ និងចំពោះទ្រង់ផងដែរ។ រូបខ្ញុំនឹងត្រូវវិលត្រឡប់ទៅកាន់ទ្រង់ដ៏មហាថ្កុំថ្កើង និងមហាខ្ពង់ខ្ពស់។ ខ្ញុំសូមសុំការអភ័យទោសពីទ្រង់ និងសូមទទួលសារភាពកំហុសចំពោះទ្រង់។

ទូអានេះ ស្ថិតក្នុងចំណោមទូអាអ៊ិសទីហ្វតះ (ទូអាពេលចាប់ផ្តើមសឡាត) ជាពិសេស ក្នុងពេលសឡាតគីយ៉ាមុលឡៃល៍។